في البداية طبعا انا اقصد الحديث عن عقلية غالبية الشعب المصري للاسف وليس الأقلية الواعية والتي قامت بتنحية عقلها تماما لتستبدله في اتخاذها للقرارات او تبني الأراء بالمشاعر او الانطباعات العاطفية او السطحية او اي شئ لا يحتاج منهم الي تفكير او حتى قاموا بأحالة هذا العقل علي المعاش وتوليه اشخاص ما للتفكير بدلا منهم واتخاذ القرارات الصائبة عنهم فتجد انك عندما تناقش البعش في شئ ما يقول هذه الجملة " لأ غلط اللي بتقوله لأن (فلان) قال كذا "هذا الفلان ليس نبيا ولا الها ولا ابو العريف ولكن كل ما في الامر ان الشخص المتكلم ارتاح الى شخصية فلان ومن ثم سلم له ووضع عقله في الثلاجة او اصدر له شهادة وفاه وقام بدفنه الى الابد والبركة في (فلان) قد يكون ايضا هذا الفلان شيخا ولكنه يكلمك في امور خارج الدين كالطب او السياسة وبالتالي معرفته بهذه المجالات او مقدرته علي اصدار نصائح واحكام مشكوك فيها نظرا لأنه جاهل بها ولا يفقه عنها شيئا !
نعود للموضوع الأهم,اصبح من الحتمي الأن الحديث عن ضرورة تشكيل مجلس رئاسي والأستغناء عن خدمات المجلس العسكري وتشكيل حكومة وطنية قوية تحكم قبضتها علي البلاد وتوقف كل متطرف او عابث بأمن البلاد عند حده,كل لحظة تأخير او تهاون معناها ضحايا قتلى وجرحى ...معناها مزيد من المدنيين يعتقل ويحاكم عسكريا ...معناها مزيد من الظلم مزيد من الفساد.
رغم كل هذا مازلت تجد بعض الطوائف المعارضة منهم من هو معارض للمبدأ ذاته ومنهم من هو معارض للمجلس ولكن يريد الحكومة ويحب عصام شرف ومنهم من يريد المجلس ويرى ان الحكومة هي المقصرة (على اساس ان الحكومة تقدر تحك ولا تتنفس قبل اخد الأوامر من المجلس الموقر.
طيب بالنسبة للطائفة الأولى من خلال محاوراتي معهم في الشارع وبعضهم للأسف يمت لي بصلات قرابة وصداقة تجدهم يرددون نفس نغمة انصار المخلوع والأستقرار يعني لو المجلس مشي مين هيجي بداله؟ طب هتختاروا البدائل ازاي؟ طب ما هو مفيش حد هيتوافق عليه كل الناس !!!
ياسلام يعنى انتم بروح امكم لما مبارك مشي كنتو اختارتوا ان المجلس العسكري يمسك؟؟ وبعدين زي ما مفيش ناس موافقة علي المجلس العسكري برضه المجلس الرئاسي هيكون في ناس معترضه عليه,احنا هنختار شخصيات وطنيه لا يختلف عليها اتنين اللهم الا الفسدة اصحاب مبدأ الأعتراض لمجرد الاعتراض ودول هتلاقيهم اصلا مكنوش في الثورة ولا ليهم اي علاقة بيها واحنا هنسيبهم (يهوهوو وخلاص)
الطائفة الاولي دي في جزء منها معترض من علي اليه الأختيار ولكن هو شايف ان كل شئ حلو وجميل وان المجلس العسكري زي الفل بس هو محتاج شوية وقت,طنطاوي انقذ مصر من حرب اهليه وحتى لو كان فاسد فهو خلاص رجع لعقله وتاب وربنا بيقبل التوبة والجرايد خصوصا جريدة العهر المسماه الاخبار عاملالي صفحة كاملة حاطة فيها وثيقة ويكيلكس اللي بتقول ان طنطاوي كان من معارض التوريث والخصخصة و و و لحد ما حسيت ان طنطاوي رجلا من ال فرعون يكتم ايمانه ,حى قبل بداية انتشار هذه الوثيقة وفي ناس كتير شايفة ان طنطاوي رجل طيب وبعدين لما تشد في شعرك وتسأل انتو عرفتوا منين ولا بتتكلموا علي اساس ايه متلاقيش رد بس انا عندي الرد وللأسف هو صادم لكن هي دي الحقيقة وما سأقوله ينطبق علي عصام شرف بالضبط كما ينطبق علي المشير طنطاوي,بصوا معايا تحت كدة :
لقطة من فيلم عربي هابط " سيدي القاضي حضرات المستشارين,,انظروا الى هذا الوجه المائكي الطاهر البرئ,,هل تصدقون يا حضرات المستشارين ان هذا الرجل ممكن ان يكون قد ارتكب حقا هذه الجريمة؟ " محامي فاشل مش لاقي حجة يدافع بيها عن موكله ومعندوش ادلة فاستخدم الاسطوانه الهابطة دي
ايه القرف دة !!!!! صح ,نرجع لموضوعنا بقي, انا عايزة اتكلم في نقطة تانية خالص وهي طريقة تفكير الشعب المصري,الاعلام المصري لا يتداول اي صور للمشير طنطاوي عدا هذه الصور,طب ليه مع انها قديمة وفي صور تانية كتير !!! لكن دا جزء من الألعاب النفسية,لنفرض ان احنا منعرفش الراجل دا خالص وجينا شفناه مرة في الشارع هنقول ايه؟ شكله طيب وغلبان صح؟ عنيه تيدوا مش خبيثة صح؟ ممكن واحد يطلع يقول سيماهم في وجوههم كمان بالمرة,طيب هوا دة اللي بيحصل لما تيجي تقول المشير متواطئ وابن وابن وعايز يخمد الثورة يقولك اتقي الله حرام عليك,الحقيقة انك اول ما بتكلمه عن المشير عقله تلقائي بيستحضر الصورة وبيركب عليها الكلام اللي حضرتك بتقوله,خاين عميل حرامي ! لأ شكله مش كدا خالص,انت حد كداب وبتضحك عليا ويبدأ عقله في طرد كلامك ويستحضر الحاجات التانية اللي ممكن تركب علي الصورة,رفض يضرب المتظاهرين وخلي مبارك يتنحى بالعافية و و و مزيد من الهطل
ترجع تقوله طب هو ساب مبارك شهرين ليه لحد ما هرب الفلوس كلها ومبدأش التحقيق (الوهمي) معاه الا بعد كل الفترة دي؟ (لا رد ) طيب لما هو كان يقدر يقبض علي صفوت وزكريا وسرور والعالم دي كلهم ورا بعض كدة استنى عليهم لحد ما ظبطوا امورهم ليه وهربوا فلوسهم وظبطوا وضعهم القانوني,ماهو الفلوس اللي اتهربت دي فلوسي وفلوسك ! (لا رد) طب بلاش كل دة بذمتك ودينك في حد هيقعد ملازم مبارك 20 سنه ويكون شريف ؟؟ بأي منطق ؟ حتى لو هو كان ابو الشرف كفاية البيئة القذرة اللي هيزرع فيها وغصب عنه هيبقي حرامي يا اما مبارك كان هيديله بالجزمة ومع السلامة,اصل في مصر عشان تكبر لازم تكون حرامي ومش محترم,مفيش مكان للشرفاء واللي بتثبت عليه تهمة الشرف لازم يقصى من منصبه ويعاقب قورا مش يقعد 20 سنه !!ايه رأيك في الكلام دة (لا رد) هتلاقيه ينسحب ويسيبك ويمشي ومفيش مانع قبل ما يمشي يقفعك الكلمتين بتوع انتو عايزين تخربوا البلد ومحدش عاجبكم ! هو هنا نفض الفكرة تماما عن عقلة لما لقى انه فعلا حد ساذج وبيضحك عليه (زي العبيط يعنى) فعقله رفض يعترف انه مغفل وانه راسم صورة وهمية في دماغه فقام رامي عليك انت اللوم وسابك وجري عشان يهرب من الحقيقة وبعد شوية هيقنع نفسه ان انت فعلا عميل او محدش عاجبك او او وهيقتنع فعلا ويوقف عقله تانى عن التفكير بعد ما كنت انت ابتديت تخليه يفكر يعقلانيه وفتحت عينه علي واقع هو ببساطة ((مش عايز يشوفه))
الفئة دي مكنتش شاركت في الثورة ولذلك لن اقنعها ولا يهمني اقتناعها من عدمه لكن في فئة تانية كانت موجودة معانا في التحرير في احد الايام قبل رحيل المخلوع لقيت واحد بيهتف لول مرة هتاف غريب "يا مشير يا مشير احنا ولادك في التحرير" التف ساعتها ورايا لقيت شاب شكله بسيط يعنى ممكن يكون حرفي او شخص تعليم متوسط كما استشفيت من طريقة ملابسه,لقيت الناس بعدها بتردد الهتاف ! كنت هقولهم ازاي تتكلموا كدة دة واحد من رجاله مبارك بس احجمت لأن كان في عدد كبير بيهتف معاه,انا مش فاكرة الواقعة دي امتى بالظبط ولكن اعتقد بعد موضوع طيارة الاف 16 بيوم واحد لما المشير نزل عند ماسبيرو وقابل صغار الضباط هناك,المهم هذا الهتاف الذي ظل يتردد حتى تنحي المخلوع اضافة الي الشعار الذي ردده الشباب بداية من مساء الجمعة 28 يناير وهو "الجيش والشعب ايد واحدة" ساهموا بدون قصد في جزء من معاناتنا دلوقتى,اضف لهذا كله ان المشير بحكم طبيعة عمله لم يكن دائم الظهور اعلاميا بالتالي صورته لم ترتبط بمبارك في اذهان الكثيرين زي صفوت الغير شريف كدة او فتحي شرور او غيرهم,يعنى نحن لم نكن نرى المشير الا في احتفالات اكتوبر السنوية وتخريج الدفعات الجديدة من الكلية الحربية في لقطتين تلفزيونيتين كل سنة وخلاص.
فئة الثوار دي اعتقد انها كانت مجرد سقطة وانهم جميعا افاقوا ومقتنعون تماما بفساد المجلس ومستعدون للعودة الي ميدان التحرير (ان شاء الله ظني فيهم لا يخيب)
اتكلم بقي عن الطائفة الثانية المقتنعة بفساد المجلس وضرورة رحيله الفوري ولكن ترفض رحيل الحكومة ومؤمنة بعصام شرف وهؤلاء جزء منهم من الغالبية صاحبة العقل الصدئ وجزء منهم من الثوار المخلصون للأسف ويستندوا في دفاعهم اضافة لما قلت سابقا عن العنصر الشكلي والانطباع الذي الذي يخلفه له عصام شرف عندما تنظر له للمرة الاولى انه شخص طيب وغير خبيث والشعب المصري طول عمره قلبه دليله,ركزوا معايا كدة
دة اول انطباع اضافة الى عده نقاط منها على سبيل المثال:
1-فور رحيل احمد شفيق (الي غير رجعة باذن الله) حدثت حرائق جهاز امن الدولة في عدة اماكن مما يوحي ان هؤلاء بعد ان فقدوا داعمهم يسعون لطمس جرائمهم خوفا من الوزير الجديد ,اذا هو حد مش منهم,شريف يعنى
معروف لكل الناس ان الأنطباع الاول يدوم وهذا كان الأنطباع الأول للناس عن عصام شرف
2-تم الاستغناء عن بعض الوجوه القبيحه جدا والكالحة كوزيري الداخلية والخارجية مما رفع عبء نفسي كبير عن نفسية المواطن المصري جراء وجود هذه المناظر في الوزارة رغم كل مواقفها المشينة من الثورة والثوار
3- بدا الناس يشاهدون لأول مرة ضباط الشرطة في الشوارع,طبعا جهاز الشرطة لازال مقصرا ولكن بداية نزول هؤلاء كانت مع تعيين العيسوي
بالأضافة الي اشياء كثيرة اخرى مثل رفع اجور الاطباء ولكن لا مجال للحديث عنها حتى لا يتحول الموضوع الى نشرة اخبار وشئ اخر يجب ان يوضع في الحسبان وهو استضافة برنامج العاشرة مساء الخاص بمنى الشاذلي لعصام شرف في بداية توليه الوزارة والحديث المؤثر الذي دار بينهم عن احوال مصر ووصل ان عصام شرف عيناه غرغرت بالدموع اثناء الحديث خوفا وقلقا علي مصر ودي حاجة طبعا المصريين عمرهم ما شافوها في حياتهم (احتمال ميشوفوهاش تانى) فمش لازم تمر مر الكرام ورفعت اسهم عصام شرف الي القمة عند المصريين وبات من الصعب جدا ان تهبط وحتى وهي تهبط الان فمن الصعب تفريغ كل هذا الرصيد الضخم في يوم وليله.
لا ننسى كذلك ان عصام شرف كان من المشاركين في المظاهرات وبالتالي لبى رغبة الكثيرين الذين ارادوا وزيرا من رحم الثورة وعندما تناولت وسائل الأعلام السيرة الذاتية لعصام شرف وكيف خرج من الوزارة لأنه (شريف) وبعض من ابحاثه ودراساته بالخارج اوجدت للناس يقينا ان هذا هو الشخص المناسب في المكان المناسب
لكن هناك علامات استفهام لم يستطع مؤيدو عصام شرف الاجابة عنها او جاءت الاجابة الوحيدة المتاحة او (الحجة) الوحيدة المتاحة وهي انه (ياحرام مضغوط عليه والمجلس العسكري مقيد حركته!) يعنى انت عايز تقول انه طرطور ؟ مين يقبل علي نفسه طيب انه يبقي طرطور؟ انت بتقولي انا بحترمه عشان هو طرطور؟ هل دة منطق ناس ثوار عايزين ينهضوا ببلدهم يولوا عليهم طرطور يحركه الفسدة وهو لا يحرك ساكنا؟ طيب ماذا عن قانون تجريم التظاهر وبنوده المائعة؟ كيف سمح الثائر بمرور قانون يكتم صوت الثوار؟ ماذا عن مجزرة 9 ابريل؟ عندما التقيت المشير بعدها يا دكتور عصام تخيلت انك تقدم له استقالتك وكم كنت ساحترمك وقتها ولكن هذا لم يحدث؟ نعم انت لم تملك شيئا لتفعله لأنهم هم العسكر وهم القوة ولكن انت تملك تقديم استقالتك ولم تفعل,يمكن تكون قدمتها والمشير رفضها وطلب منك تكذيب الاشاعة القائلة بانك ستسقيل؟ كل شئ جائز
في النهاية كلمة حق لابد ان تقال ان بعصام شرف او غيره كانت الخطى ستسير علي ما هي عليه حسب خطة المجلس العسكري يعنى بصرف النظر عن من هو رئيس الوزراء او وزير الداخلية وحتى لو كنا اخترنا شخص اخر نتفق عليه كانت ستحدث الفتن الطائفية والاضرابات وخسائر البورصة وكل هذه الاحداث,اخشى انه لو طالب الناس بسقوط حكومة شرف دون المجلس او قدم المجلس الحكومة كبش فداء سيكون خطئا فادحا لأني اجزم ان اختيار المجلس لشخصية رئيس الوزراء حينئذ سيكون كاختيار المحافظين وسيأتي شخص يخيب امال الجميع
ليست هناك تعليقات:
إرسال تعليق